У гэтую суботу 26 сакавіка ў Берасці адбудзецца майстар-клас «Дзіцячых творчых майстэрняў» галерэі «Ў» пад назваю «Унутры карціны Анры Матыса». Удзельнікі будуць разглядаць аплікацыю мастака «Папугай і русалка». Разам яны паспрабуюць пашырыць чароўны сад, які Матыс увасобіў у гэтым творы, праз стварэнне дрэваў і кветак, казачных птушак ды істотаў. Мэта майстар-класу – навучыць дзяцей любавацца адною працай працяглы час. Паказаць, як працу можна «чытаць», разглядаць, якія пытанні задаваць сабе. Для дзетак ва ўзросце 7–12 гадоў.
Вядоўцы майстар-класу:
Мастацтвазнаўца Сафія Садоўская. Скончыла Маскоўскі дзяржаўны ўніверсітэт, прайшла практыку ў Музеі выяўленчых мастацтваў імя Пушкіна, працавала ў Нацыянальным мастацкім музеі Рэспублікі Беларусь. Прайшла онлайн-курс інтэрактыўнага навучання мастацтву дзяцей і дарослых (музей MOMA, Нью-Ёрк, ЗША).
Аўдыявізуальны мастак і даследчык Bazinato. Скончыў Беларускі дзяржаўны педагагічны ўніверсітэт імя М. Танка. Вучыўся ў Еўрапейскім гуманітарным універсітэце на факультэце візуальнага дызайну і медыяў (Вільнюс, Літва). Удзельнік шматлікіх выставаў як у Беларусі, гэтак і за яе межамі. Вядоўца творчых майстэрняў у межах праекту Autism Inside Out. Куратар фестывалю творчых практыкаў і крытычных ведаў «Багна». Трэнер школы экалагічнага актывіста Ш.Э.А.
Аб праекце:
Дзіцячыя творчыя майстэрні – праект галерэі «Ў», створаны для дзяцей ад 7 да 12 гадоў, асноўная задача якога – гэта раскрыццё творчага патэнцыялу і развіццё вобразнага мыслення маленькага чалавека праз навучанне розным мастацкім тэхнікам, знаёмства з гісторыяй мастацтваў, а гэтаксама з сапраўднымі мастакамі ды куратарамі. Дзіцячыя творчыя майстэрні існуюць 4 гады, за гэты час узніклі 5 паўнавартасных курсаў для дзяцей і 8 тэматычных фестываляў.
Напярэдадні, 25 сакавіка, у прасторы «Крылы Халопа» адбудзецца лекцыя заснавальніцаў галерэі «Падземка» і галерэі сучаснага мастацтва «Ў» Валянціны Кісялёвай і Ганны Чыстасердавай «Як адкрыць галерэю сучаснага мастацтва ў Беларусі». Гэта другі рэгіянальны івэнт, зарганізаваны 34mag.net і Euroradio у 2016 годзе. Сачы за афішай!
Майстар-клас для дзяцей і лекцыя для педагогаў і бацькоў адбудзецца ў арт-прасторы «Крылы Халопа»,
Увага! Колькасць месцаў абмежавана. Запіс па тэл. +375298005861
адрас: вуліца Халтурына 2/1.
12:00 дзіцячы майстар-клас «Унутры карціны Анры Матыса»
15:00 лекцыя для бацькоў і педагогаў
Уваход вольны
Тэлефон для даведак +375298005861