Гісторыі Беларусі. Вялікае сяло
“…Якія ўсе былі людзі, такіе добрыя, дабразычлівыя. Пасля вайны былі харошыя людзі. Ой, а як было добра, весела, песні такія харошыя спявалі. А вечарам моладзеж як сабярэцца, спяваюць, аж у другім сяле слышна. А тут о, плачшадака для моладзі была. Як сабяруцца, на гармошках граюць, а дзяўчаты як стануць танцаваці – пыў стаўбом ідзе, так што нічога не відна. Дружна было. А як радыё паявілася, як яно іграла, на ўсю дзярэўню чуваць. На сталпах было яно, і ўжо далеко чуці, як яно іграе, усе радыя былі…”
З сабраных аповедаў пра Вялікае сяло
На працягу чэрвеня- жніўня 2014г. тэатр “Крылы халопа” рэалізоўваў праект, у межах якога праводзіў майстар-класы для дзяцей вёсак Вялікае Сяло і Ялова Пружанскага раёна, што ў 120 кіламетрах ад Брэста каля Белавежскай пушчы.
На першым этапе дзеці слухалі і збіралі гісторыі мясцовых бабуляў і дзядуляў,- аповеды з жыцця, гісторыі пра вёску, часы вайны, пра суседзяў, немцаў, партызанаў, каханне, і нават Кацярыну ІІ… Пасля дзеці асвойвалі тэхніку тэатра ценяў, самі стваралі лялькі і сцэнаграфію, вучыліся прамаўляць тэатральны тэкст і ствараць музычнае і гукавае афармленне спектаклю. Вынікам стаўся спектакль “Аповеды Вялікага сяла”.
Гісторыя, якую мы ведаем па падручніках — гэта яшчэ далёка не ўся гісторыя. Вельмі часта мы не разглядаем “маленькія” чалавечыя гісторыі, як важныя для разумення гістарычных падзей. Вусныя аповеды могуць стаць адпраўнай кропкай пераасэнсавання “вялікай гісторыі”. Нам можа здавацца, што важнае (і гістарычна значнае) адбываецца дзесьці далёка, у вялікіх гарадах, з удзелам вядомых людзей. Але аповед пра вайну, расказаны бабуляй з суседняга дома, можа змяніць наш погляд на тое, што мы вывучалі ў школе. І на ўласную вуліцу, вёску, горад, краіну. Малое становіцца вялікім, нязначнае становіцца важным…
Каардынацыя праекта: Алена Штык
Ідэя: Аксана Гайко
Тэатральныя педагогі: Алена Штык, Сяргей Гайко, Святлана Гайдалёнак
Рэжысура: Алена Штык
Музычнае афармленне: Насця Хмель
Акторы: Насця Гайко, Глеб Багданаў, Маша Штык, Аня Калінічэнка, Раман Калінічэнка, Лізавета Каравай, Марыя- Віялета Каравай, Ульяна Комса, Люба Чабатоўская, Наташа Чабатоўская, Юра Чабатоўскі
Прэм’ера спектакля: 10 жніўня 2014г. у рамках фестывалю “Прызба-фэст: тэатр, экалогія, сацыяльнае мастацтва”(вёска Залессе, Брэсцкая вобласць).